e Labbuwan Kesong
e Labbuwan Kesong
mekol juko’ song-tarosong
reng-oreng ondhur dhateng
sampan mole kosong
ranyeng kowagga messin
atharat sakarat: ora’-ora’ mellar
e Labbuwan Kesong
reng-oreng agarungngong
parjalanan ta’ ontong, buttong
pangara mekola pangara
ngusonga sajja
dhari sampan-sampan bajra
bannya’ sampan mole kalaban ontang
agentang, asandhing teyang
pandhira mera ta’ adhara
pote olay lajarra
asapo’ angen: pangara se barenteng dhalem pekker
abantal omba’: nyaba-nyaba tapalga’
Labbuwan, Sappar 1442
Jangka’
bisa ekagabay kalaban seppet, lonyo ban sepet
kaju paddu empa’ tebbel pa’ nyare
kadhang bato kombung, se magaliya’ ka tombung
ngala’ jangka’ sopaja bisa toju’
nyaba’ monteng, ora’ epaenneng
bannya’ oreng arebbu’
padha terro toju’
dhari sakeng terrona, adu’a e sokona embu’
ta’ loppa saleng tambu’
sopaja olle jangka’ lembu’
loppa ka taretan
laju mara tan-kotan
se pon arebba palotan
jangka’ eosong, eja’-taja’
sampe’ ora’ le’erra pegga’
loppa temor, loppa bara’
sabab jangka’ sajan berra’
polana ta’ andhi’ ora’
ta’ noro’ ngosong jangka’
bali’ ngampar lama’
buso’ bannya’ ban ta’ sella’
Labbuwan, Sappar 1442
*Puisi ini dipetik dari buku Antologi Puisi berbahasa Madura “Sokana” Komamedia-Arsip Prosa Madura, 2020.
*Mat Toyu merupakan Alumni UIN Sunan Kalijaga, sekarang menetap di desa Karduluk, Pragaan Sumenep. pada tahun 2022 mendapatkan Anugerah Sastera Rancage di Bandung Jawa Barat atas bukunya yang berjudul “Ngejung” Sulur Pustaka (2021).
